Psa 67 | HUI | STEP | Ngode Datagaliwabe-o í̠na ina dara nahabehego harugo lowa dara halu biamogoore bibe. Ina de hondo halu pele ngulene ngadagua pele ngibe. Ani beregola wali agali dindi bibahendeni karumebi í̠naga hame ogobi wiyada manda bilo ani bibe. Hameigini tara tara paluyu pedaru bibahendemebi í̠na ti pele mirida manda bilonaga ani bibe.

a 67.1Dag 6.25, Iba 31.16, 119.135

b 67.4Iba 96.10, 96.13, 98.9

c 67.6LBM 26.4, Iba 85.12

Psalms 67

Ngode Datagaliwabehondo ka̱i̱ lalu lenego ogo

1 Ngode Datagaliwabe-o í̠na ina dara nahabehego ^a
harugo lowa dara halu biamogoore bibe.
Ina de hondo halu pele ngulene ngadagua pele ngibe.
Ani beregola wali agali dindi bibahendeni karumebi
í̠naga hame ogobi wiyada manda bilo ani bibe.
Hameigini tara tara paluyu pedaru bibahendemebi
í̠na ti pele mirida manda bilonaga ani bibe.

3 Ngode Datagaliwabe-o wali agali karume
í̠naga mini mo yaraga helo hameledo.
Wali agali bibahendeoreme í̠naga mini mo yaragaore helo hameledo.

4 Hameigini tara tara paluyu pedarume ^b
tinaga miniha turu halu yanga lowa iba gana lelo.
Í̠na wali agali tale nabi bibahendehondo ogobi dege dege biaga kegonaga ani lelo.
Dindi bibahendeni hameigini paluyu pedamaru
í̠na bayuwaore haru hariligonaga iba gana lo ngilo hameledo.

5 Ngode Datagaliwabe-o wali agali karume
í̠naga mini mo yaraga helo hameledo.
Wali agali bibahendeoreme
í̠naga mini mo yaragaore helo hameledo.

6 Dindini tomo hangaramaru damene bibahende anda haragola nalu kamagoni. ^c
Ngode Datagaliwabe inanaga Ngode Datagaliwabeore kago
ibugua ina mo gumbila hayagome
ina turu halu dungulo kamagoni.

7 Ngode Datagaliwabehanda inahondo turu howa mo gumbila halu kagoni.
Wali agali ona kaware karumebi dindi lene leneha paluyu pedarumebi
bibahendeme ibunaga mini mo yaraga haiore helo hameledo.